Jenès ayisyen an ap fè fas ak anpil pwoblèm. Lavi chak jou ka difisil lè pa gen sipò leta, pa gen ase opòtinite. Malgre sa, li enpòtan pou nou pa dekouraje. Avèk devlopman teknoloji ak edikasyon sou entènèt, gen anpil fason pou jenès ayisyen an aprann nouvo konpetans ki ka ede yo travay nenpòt kote nan mond lan. Ann gade kèk nan pwoblèm yo, ak solisyon yo.

Lefè ke leta absan, yon jèn ka santi pa gen okenn pòt ki louvri poul soti nan pwoblèm ekonomik li. Men, ak resous gratis ki sou entènèt la, li ka jwenn fòmasyon nan plizyè domèn tankou pwogramasyon, konsepsyon grafik, jesyon pwojè, ak anpil lòt ankò. Gen platfòm tankou Coursera, Khan Academy, Udemy ak YouTube ki ofri anpil kou ki ka prepare jèn yo pou mache travay mondyal la.

Anpil nan jèn yo san espwa! Pa vrèman gen opòtinite travay nan peyi a, yo santi avni yo menase. Men, aprann yon konpetans ki gen demand sou li, ka chanje sitiyasyon sa a. Devlopman web, travay dijital, freelancing ak lòt ankò, ap bay posibilite pou travay a distans pou konpayi nenpòt kote nan mond lan. Sa ap kreye opòtinite pou jenès la genyen yon revni, menm ke ekonomi an difisil.

Nan yon mond kote teknoloji ap vale tèren, jenès ayisyen an gen pouvwa pou l chanje desten l. Pa kite feblès leta fèw pèdi espwa. Fè efò pou jwenn resous ki disponib, fè rechèch, aprann toutotan ou kapab. Sa ap louvri pòt pou jwenn travay, mete konpetans ou yo osèvis biznis pa ou.

Mwen konnen nou gen anpil potansyèl. Lè nou aprann epi devlope konpetans dijital yo, nou ka bati yon avni miyò malgre difikilte nap kontre nan peyi nou. Pa janm dekouraje, kontinye aprann, epi sezi chak opòtinite ki vin jwenn ou.

Avni nou se nan men nou poul ye!

Vital-Herne ZÉPHY